qer282021
Vaksinat anti-Covid: raportohen shtatë raste miokarditi te të rinjtë
Shtatë adoleshentë kanë zhvilluar miokardit akut pas dozës së dytë të vaksinës Covid të Pfizer-Biontech, e aprovuar së fundmi për përdorim tek adoleshentët e moshës 12 deri në 15 vjeç. Kështu thuhet në një artikull të botuar në "Pediatrics", me autore kryesore Mayme Marshall, pediatre në Universitetin e Shëndetit dhe Shkencës në Oregon, Portland. "Të shtatë pacientët, djem të moshës 14 deri 19 vjeç që zhvilluan miokardit simptomatik ose mioperikardit brenda 4 ditëve nga doza e dytë mbijetuan dhe patën zgjidhje të shpejtë të simptomave", shkruajnë autorët, duke shtuar se me të dhënat që janë në dispozicion nuk është e mundur të vendoset një lidhje shkakësore midis vaksinës dhe miokarditit.
"Sidoqoftë, të dhënat duhet të vlerësohen në mënyrë të thelluar në studimet e ardhshme mbi vaksinën, pasi hulumtimi i mëparshëm ka përfshirë një numër të kufizuar fëmijësh dhe mund të mos ketë zbuluar ngjarje anësore të rralla, por të rëndësishme", vazhdon studiuesja, duke shpjeguar se rastet e përshkruara kanë ndodhur te meshkujt e shëndetshëm që janë paraqitur në urgjencë me dhimbje gjoksi dhe simptoma të tjera, përfshirë lodhje, të përziera, dhimbje muskulore ose asteni, brenda katër ditësh nga doza e dytë e vaksinës Pfizer-Biontech Covid-19. Pesë kishin ethe, por infeksioni Covid-19 u përjashtua në të 7 rastet, bazuar në tamponet molekulare negative. Gjithsej, gjashtë djem morën antiinflamatorë josteroidë (FANS/NSAID) dhe katër imunoglobulina intravenoze dhe prednizon oral. Nga këta të katërt, njëri mori dozë të lartë metilprednizoloni dhe të gjithë iu përgjigjën shpejt trajtimit.
Në një editorial shoqërues, Sean O'Leary (Universiteti i Kolorados në Aurora) dhe Yvonne Maldonado (Shkolla e Mjekësisë e Universitetit të Stanfordit) shkruajnë: "Mbi 2 milionë adoleshentë kanë marrë dy doza të vaksinave Pfizer-Biontech në Shtetet e Bashkuara, kështu që fillimi i miokarditit ose mioperikarditit duket të jetë një efekt anësor i rrallë që i përgjigjet mirë trajtimit. Sidoqoftë, kërkohet vigjilencë e vazhdueshme, duke pasur parasysh se përfitimet e vaksinimit i tejkalojnë rreziqet e mundshme".
Pediatrics 2021. Doi: 10.1542/peds.2021-052478
http://doi.org/10.1542/peds.2021-052478
Pediatrics 2021. Doi: 10.1542/peds.2021-052644
http://doi.org/10.1542/peds.2021-052644