mar22021
Diabeti i tipit 1. Përgjigjja imunitare ndaj insulinës identifikon njerëzit në rrezik
Përgjigjja imunitare ndaj insulinës mund të ndihmojë në identifikimin dhe trajtimin e mundshëm të njerëzve në rrezik për zhvillimin e diabetit të tipit 1 (T1D), përfundon një letër e sapobotuar në "PNAS" dhe e nënshkruar nga studiuesit e Qendrës së Diabetit të Fëmijërisë Barbara Davis, në Universitetin e Kolorados.
"Në një grup individësh të predispozuar gjenetikisht për të zhvilluar diabet të tipit 1, janë matur përgjigjet imune ndaj insulinës natyrore dhe peptideve të insulinës hibride, por meqenëse jo të gjithë individët e ndjeshëm do të zhvillojnë më pas sëmundjen, në veçanti u ekzaminuan përgjigjet imune të qelizave T në gjakun periferik, që mund të ndodhin para fillimit të diabetit klinik", shpjegon bashkautori Aaron Michels, profesor i asociuar i mjekësisë së brendshme në Anschutz dhe studiues në Barbara Davis, i cili së bashku me kolegët mblodhën mostrat e gjakut nga një grup i gjenetikisht në rrezik, çdo 6 muaj, për një periudhë prej dy vjetësh.
Duke vepruar kështu, studiuesit zbuluan se përgjigjet inflamatore të limfociteve T ndaj peptideve hibride të insulinës ishin të lidhura në mënyrë të konsiderueshme si me përkeqësimin e vlerave të glukozës në gjak, ashtu edhe me përparimin gradual në zhvillimin e T1D-së. "Këto rezultate tregojnë një hap të rëndësishëm përpara në identifikimin e hershëm të rrezikut për T1D", shkruajnë autorët, duke shtuar se nëngrupi i pacientëve me këto përgjigje specifike imune, mund të përfitojë në të ardhmen nga trajtimi imunologjik që synon jo vetëm vonimin e shfaqjes së T1D, por edhe parandalimin e saj për disa vjet. Michelsi përfundon: "Këto rezultate mund të shkojnë përtej vetë sëmundjes: puna jonë është e përqendruar te diabeti, por mund të ketë implikime edhe për sëmundje të tjera autoimune. Të kuptuarit se si reagon sistemi imunitar mund të jetë thelbësor në përpjekjen për të parandaluar sëmundjen, përpara shfaqjes së simptomave klinike".
PNAS 2021. Doi: 10.1073/pnas.2019129118
https://doi.org/10.1073/pnas.2019129118