kor242020
Ndryshojnë rekomandimet e menaxhimit të ezofagitit eozinofilik. Ja, cilat janë barnat e linjës së parë
Shoqata Amerikane të Gastroenterologjisë (AGA) dhe Task Forca e Përbashkët për Parametrat e Praktikës së Alergji-Imunologjisë kanë formuluar një dokument të përbashkët, i cili rekomandon që glukokortikoidet lokale të përdoren si trajtim i linjës së parë për ezofagitin eozinofilik. Dokumenti, i botuar në "Gastroenterology" dhe në "Annals of Allergy, Asthma and Immunology", është i pari i përgatitur nga dy shoqata profesionale mbi këtë temë dhe jep rekomandime për menaxhimin e pacientëve pediatrikë dhe të rritur.
"Ezofagiti eozinofilik është një sëmundje inflamatore kronike e ezofagut, e cila prek rreth një në 2,000 njerëz. Ajo shkaktohet nga alergenet dhe shkakton vështirësi në gëlltitje te të rriturit, me një kurs të përkeqësimit të frekuencës dhe intensitetit me kalimin e kohës", thotë Ikuo Hirano, nga Shkolla e Mjekësisë Feinberg e Universitetit Veriperëndimor të Çikagos, i cili drejtoi ekipin. "Natyrisht, sëmundja ndikon shumë në cilësinë e jetës së pacientëve. Fëmijët kanë disa simptoma që përfshijnë vështirësi në ushqyerje, dhimbje, të vjella dhe disfagji", shton ai.
Dokumenti së pari rekomandon që steroidet të jenë trajtimi i linjës së parë për sëmundjen. Udhëzimi rekomandon si mundësi trajtimi edhe frenuesit e pompës protonike (PPI), variacionet dietike dhe dilatimin e ezofagut. Ekspertët gjithashtu inkurajojnë përsëritjen e ezofago-gastro-duodenoskopisë me biopsi për të vlerësuar aktivitetin e sëmundjes pasi të jenë bërë ndryshime në terapi. Sa i përket përdorimit të terapive të reja biologjike të synuara, dokumenti raporton se këto janë nën një vlerësim aktiv dhe për këtë arsye do të nevojiten hulumtime të mëtejshme para se të shprehen mendimet. Sidoqoftë, studiuesit tregojnë se do të nevojitet një kuptim më i thellë i historisë natyrore të sëmundjes, si te fëmijët, ashtu edhe te të rriturit.
"Rekomandimet që kemi përshkruar do t'i udhëzojnë alergologët dhe gastroenterologët që të menaxhojnë në mënyrë efektive ezofagitin eozinofilik dhe të përmirësojnë cilësinë e jetës së pacientëve", përfundojnë autorët.
Annals Allergy, Asthma Immunology 2020. Doi: 10.1016/j.anai.2020.03.020
https://doi.org/10.1016/j.anai.2020.03.020
Gastroenterology 2020. Doi: 10.1053/j.gastro.2020.02.038
https://doi.org/10.1053/j.gastro.2020.02.038