nën302020
Covid-19. Të sëmurët që kanë dalë nga spitali, vazhdojnë të kenë nevojë për mbështetje
Sipas një studimi të botuar në "Annals of Internal Medicine", pacientët që kanë qenë të shtruar në spital për Covid-19, kur dalin, nuk e kanë lënë plotësisht sëmundjen pas, aq sa një përqindje e konsiderueshme e këtyre njerëzve, veçanërisht ata që janë trajtuar në terapinë intensive, vdesin brenda 60 ditëve pas daljes. "Këto të dhëna konfirmojnë që bilanci i Covid-19 shtrihet përtej shtrimit në spital", tha autori kryesor i studimit, Vineet Chopra në Universitetin e Miçiganit, Ann Arbor.
Studiuesit studiuan 1,648 pacientë Covid-19 të shtruar në 38 spitale të Miçiganit dhe zbuluan se 29.2% e të gjithë pacientëve të shtruar për Covid-19 nga 16 marsi deri më 1 korrik, kishin vdekur. 24.2% e pacientëve kishin vdekur gjatë shtrimit në spital, 6.7% e të mbijetuarve brenda 60 ditëve nga dalja dhe 15.2% ishin shtruar sërish në spital. Rezultate më të këqija janë parë te pacientët që ishin trajtuar në ICU, me një vdekshmëri prej 10.4%, pas daljes nga spitali. Në studim, shkalla e përgjithshme e vdekshmërisë për 405 pacientë që ishin në ICU ishte 63.5%. Tre kanë qenë sëmundjet kryesore bashkëshoqëruese mes pacientëve të dalë nga spitali: hipertensioni, diabeti dhe sëmundjet kardiovaskulare.
Ekspertët vunë gjithashtu në dukje se gati 19% e pacientëve të dalë nga spitali kanë shfaqur simptoma të reja ose të përkeqësuara kardiopulmonare, 13.3% kishin humbje të vazhdueshme të shijes ose nuhatjes dhe 12% raportuan se kishin më shumë vështirësi në kryerjen e aktiviteteve të përditshme. Pasojat, megjithatë, nuk ishin vetëm fizike. Gati gjysma e pacientëve të dalë nga spitali raportuan probleme emocionale dhe gati 6% kërkuan kujdes shëndetësor mendor. 36% e atyre që punonin para sëmundjes, nuk kanë qenë në gjendje të ktheheshin në punë për shkak të problemeve shëndetësore ose pushimeve nga puna dhe, mes atyre që filluan të punonin përsëri, 25% e bënë këtë me orë të reduktuara ose duke ndryshuar punë, për shkak të problemeve shëndetësore.
Më shumë se një e treta e pacientëve janë ndikuar financiarisht nga shtrimi në spital. Studiuesit theksojnë se një në pesë pacientë nuk janë ndjekur nga kujdesi parësor dy muaj pas daljes nga spitali. "Këto rezultate sugjerojnë se duhen modele më të mira për të mbështetur të mbijetuarit e Covid-19", përfundojnë ekspertët.
Annals Internal Medicine 2020. Doi: 10.7326/M20-5661
http://doi.org/10.7326/M20-5661