jan202023
Agjërimi. Ndikimi në tru dhe në rregullimin e ritmit cirkadian
Sipas një studimi të botuar në "Cellular and Molecular Life Sciences", agjërimi ka një ndikim të madh në shprehjen e gjeneve të korteksit cerebral dhe beta-hidroksibutiratit, një trup ketonik i prodhuar nga organizmi gjatë agjërimit, i cili vepron si një molekulë e fuqishme epigjenetike në tru përmes rimodelimit të drejtpërdrejtë dhe specifik të shenjave të histonit në qelizat e indit nervor.
"Mungesa e ushqimit paraqet një stimul stresues për trupin tonë, i cili duhet t'i përgjigjet kërkesave energjetike të një numri të madh indesh. Glukoza nuk është më e mjaftueshme dhe organizmi ynë fillon të prodhojë trupa ketone si një burim alternativ energjie. Në të kaluarën mendohej se truri e përdorte beta-hidroksibutiratin vetëm si një substrat për prodhimin e energjisë", shpjegon autorja kryesore e studimit Paola Tognini nga Universiteti i Pizës.
Studiuesit përdorën disa teknika të spektrometrisë së masës me rezolucion të lartë dhe u përpoqën të matin përqendrimet e beta-hidroksibutiratit në mëlçi, aty ku ky përbërës prodhohet më së shumti, në plazmë, aty ku lëshohet, dhe në tru.
Në këtë mënyrë ata zbuluan se qelizat cerebrale janë në gjendje të përdorin beta-hidroksibutiratin jo vetëm si substrat, por edhe si dhurues kimik, dhe se në këtë mënyrë ato shkaktojnë ndryshime në strukturën e disa proteinave në bërthamën e qelizave që janë në kontakt me ADN-në.
Falë këtij zbulimi, ekspertët kanë parë një sërë ndryshimesh të rëndësishme në shprehjen e gjeneve cerebrale të shkaktuara pikërisht nga agjërimi. Ata gjithashtu vunë në dukje se ndryshimet kryesore në shprehjen e gjeneve ndodhën në orën cirkadiane, por aktiviteti lokomotor u ndikua gjithashtu nga ndryshimet.
Këto ndryshime të ritmit cirkadian vazhduan edhe pasi rinisi konsumimi i ushqimit. Sipas autorëve, rezultatet e studimit sugjerojnë një përdorim të ardhshëm të të ushqyerit si një strategji alternative trajtimi për çrregullimet neurozhvillimore ose neuropsikiatrike.
Cellular and Molecular Life Sciences 2023. Doi: 10.1007/s00018-022-04673-9
https://doi.org/10.1007/s00018-022-04673-9