kor292020
Pneumonia e fituar në komunitet. Ekzaminimi i kujdesshëm fizik dhe disa elemente kryesore janë të mjaftueshme për diagnostikim...
Përshtypja e përgjithshme klinike, së bashku me disa shenja dhe simptoma kryesore, janë elementet më të rëndësishme për të përcaktuar nëse një pacient ka pneumoni të fituar në komunitet, sipas një metaanalize të botuar në "Academic Emergency Medicine". "Pneumonia e fituar në komunitet është një shkak i rëndësishëm i sëmundshmërisë dhe vdekshmërisë. Sidoqoftë, trajtimi i tepërt i kollës akute me antibiotikë është gjithashtu një problem madhor, kështu që një diagnozë më e saktë e pneumonisë mund të ndihmojë në reduktimin e përdorimit jo të duhur të këtyre barnave", shpjegon Mark Ebell, nga Shkolla Mjekësore e Universitetit të Masaçusetsit në Baystate, autori kryesor i studimit.
Studiuesit vlerësuan 17 studime kohorte perspektive mbi pacientët me pneumoni klinike të dyshuar ose kollë akute, që përdornin imazherinë si standardin e referencës. Masat përmbledhëse të saktësisë përfshijnë ndjeshmërinë, specificitetin, raportet e probabilitetit, raportet e normës diagnostikuese dhe zonën nën kurbën Roc (Aurocc). Ekspertët vunë re se prevalenca e pneumonisë së fituar në komunitet ishte 10% në nëntë studime të kujdesit parësor dhe 20% në shtatë studime të ndihmës së parë.
Probabiliteti i sëmundjes u rrit më së shumti kur ekzistonte një përshtypje e përgjithshme anormale klinike që sugjeronte pneumoni të këtij lloji, egofoni, tingull të shurdhër në perkusion dhe ethe, ndërsa ajo u ul më shumë për shkak të mungesës së shenjave jetësore anormale. Studimi sugjeron që njohja e shenjave dhe simptomave më parashikuese të pneumonisë së fituar në komunitet, mund t'i ndihmojë mjekët të fokusohen në vlerësimin e tyre dhe të shmangin përdorimin e papërshtatshëm të barnave. Autorët rekomandojnë t'i jepet përparësi mësimit dhe kryerjes së këtyre elementeve kryesore të ekzaminimit fizik, në mënyrë që radiografitë e gjoksit dhe antibiotikët të përdoren vetëm në rast nevoje reale. Për më tepër, ekspertët besojnë se kërkohen studime të mëtejshme për të vërtetuar këto rregulla premtuese të parashikimit klinik dhe për t'i plotësuar ato me shenja, simptoma dhe teste që duhet të kryhen, siç është ajo për proteinën C-reaktive.
Academic Emergency Medicine 2020. Doi: 10.1111/acem.13965
https://doi.org/10.1111/acem.13965