sht292020
Covid-19. Duke hequr kolesterolin, statinat reduktojnë rrezikun për forma të rënda
Sipas dy studimeve të zhvilluara nga kërkuesit e UC San Diego Health, pacientët që konsumojnë statina, rrezikojnë më pak për t'u prekur nga format e rënda të Covid-19 sepse heqja e kolesterolit nga membranat qelizore, e bën të vështirë hyrjen e Sars-CoV-2 në këto qeliza. Në studimin e parë, të publikuar në "American Journal of Cardiology", Lori Daniels dhe grupi i saj i punës donin të kuptonin nëse kishte apo jo një ndikim përdorimi i vetë statinave në rëndesën e infeksionit nga coronavirusi i ri.
Studiuesit analizuan në mënyrë retrospektive 170 pacientë Covid-19 dhe 5,281 pacientë Covid-negativë, duke vlerësuar ashpërsinë e sëmundjes, kohëzgjatjen e qëndrimit në spital, rezultatin dhe përdorimin e statinave, frenuesit dhe bllokuesit e enzimës konvertuese të angiotensinës (ACE) dhe receptorin e angiotensinës II (ARB) brenda 30 ditëve para shtrimit në spital. Midis pacientëve me Covid-19, 27% po merrnin në mënyrë aktive statina kur u shtruan, ndërsa 21% po merrnin një frenues ACE dhe 12% një ARB. Kohëzgjatja mesatare e qëndrimit në spital ishte 9.7 ditë për pacientët me Covid-19. Studiuesit zbuluan se përdorimi i statinave para shtrimit në spital shoqërohej me një ulje më shumë se 50% të rrezikut për zhvillim të një forme të rëndë të sëmundjes, krahasuar me pacientët Covid që nuk i morën ato.
Për më tepër, pacientët me Covid-19 që merrnin statina para shtrimit në spital, u shëruan më shpejt. Studimi i dytë, i botuar në "The Embo Journal", u drejtua nga Tariq Rana i cili, duke u përpjekur të shihte se cilat gjene ishin aktivizuar në qelizat e mushkërive në përgjigje të infeksionit Sars-CoV-2, identifikoi gjenin CH25H, i cili kodifikon një enzimë modifikuese të kolesterolit, e cila është në gjendje të bllokojë aftësinë e HIV-it, Zikës dhe disa viruseve të tjera për të hyrë në qelizat njerëzore. Aktiviteti enzimatik i CH25H-së prodhon 25-hidroksikolesterol (25HC), i cili nga ana tjetër aktivizon një enzimë tjetër (ACAT) e cila ezauron kolesterolin e arritshëm në membranën qelizore. Ekspertët vlerësuan se çfarë ndodh me qelizat e mushkërive të njeriut në laborator me dhe pa trajtim me 25HC kur hasin Sars-CoV-2 dhe zbuluan se shtimi i 25HC pengon aftësinë e virusit për të hyrë në qeliza, duke bllokuar pothuajse plotësisht infeksionin. Ekspertët arritën në përfundimin se Sars-CoV-2 ka gjithashtu nevojë për kolesterol për të hyrë në qelizë përmes receptorit ACE.
Am J Cardiology 2020. Doi: 10.1016/j.amjcard.2020.09.012
https://doi.org/10.1016/j.amjcard.2020.09.012
Embo Journal 2020. Doi: 10.15252/embj.2020106057
https://doi.org/10.15252/embj.2020106057