mar212017
Fruthi në rajon. Silva Bino: Epidemiologët të bindin prindërit që refuzojnë vaksinën
Humbja e jetës së 17 fëmijëve të moshës 1-5 vjeç në Rumani nga fruthi si dhe shpërthime të kësaj sëmundje ngjitëse në Itali, Francë, Spanjë dhe vende të rajonit, kanë alarmuar autoritetet shëndetësore në vendin tonë për shkak të një tendence për të refuzuar vaksinën kundër fruthit që bëhet tek bebet 12-muajshe. Sipas shefes së departamentit të sëmundjeve infektive në Institutin e Shëndetit Publik (ISHP), të gjitha drejtoritë e shëndetit publik në të gjithë vendin do të kontrollojnë kartelat e fëmijëve në çerdhe, kopshte dhe shkolla për të verifikuar ata që nuk e kanë bërë vaksinën.
"Epidemiologët duhet të bashkëpunojnë më qendrat shëndetësore, por dhe me drejtoritë e shkollave për të verifikuar të gjithë kartelat e nxënësve. Si fillim duhet të kontaktojnë prindërit në mënyrë që të binden të bëjnë vaksinën te fëmija i tyre pasi i riskohet jeta. Në rast të kundërt në bazë të ligjit të sëmundjeve infektive fëmija mund të përjashtohet nga shkolla. Kjo në të mirë të fëmijëve dhe komunitetit ", shprehet Dr.Bino
Ndonëse Shqipëria renditet ndër vendet që ka një mbulesë të lartë të vaksinimit të popullatës gati në masën 95%, vitet e fundit është vënë re refuzimi në rritje i prindërve për të bërë vaksinën e fruthit, çka sipas Binos këta prindër vënë në rrezik jetën e fëmijës së tyre, por dhe të bashkëmoshatarëve.
"Për shkak të një fushate anti-vaksinë që bëhet nga organizata të caktuara është vënë re një refuzim në rritje edhe i prindërve në Shqipëri për t'i bërë fëmijës së tyre vakinën e fruthit. Ka numër të shtuar të rasteve në Peqin, Delvinë, Fier, Vlorë, Shkodër, por edhe në Tiranë", shprehet Dr.Bino.
Prindërit shpesh nga mungesa e informacionit apo duke lexuar site të ndryshme në internet, të cilat publikojnë një propagandë të tillë duke bërë lidhje të vaksinës së fruthit me autizmin nuk duan që të bëjnë tek fëmija e tyre këtë vaksinë. Por shpesh edhe mjekët rekomandojnë që kjo vaksinë të shtyhet në kohë, çka sipas Binos është e gabuar pasi nuk është provuar shkencërisht asnjë lidhje midis tyre. Vaksina e fruthit pasi bëhet te bebet 12 muajsh përsëritet në moshën 5 vjeç.
Alma Demiraj