dhj12017
HIV/AIDS në Shqipëri, 81 raste të reja me HIV gjatë vitit 2017
Viti 2017 ka shtuar 81 raste të reja me HIV, nga të cilët 57 janë meshkuj, 24 femra dhe njëri prej tyre është një fëmijë 7 vjeçar i infektuar nga mamaja. Trendi i infektimit duket se është i njëjtë me atë të një viti më parë. Numri total i të prekurve me HIV/AIDS në Shqipëri është 1090. Specialistë të fushës theksojnë se mbetet problem diagnostikimi në stade të avancuara.
Ndërsa kryetarja e shoqatës së personave që jetojnë me HIV/AIDS ngre me shqetësim diagnozën e vonë të personave të prekur. "Sivjet kemi 15 raste vdekjesh, nga të cilat 3 kanë qenë raste të personave të diagnostikuar këtë vit. Faktori kryesor që ka çuar në vdekje ka të bëjë me diagnostikimin e vonuar. Përgjithësisht, 70% e rasteve hyjnë në terapi shumë vonë", shprehet Olimbi Hoxhaj.
Sipas zonjës Hoxhaj, testimet vullnetare kanë shënuar rënie në mënyrë drastike. Këtë vit, nuk u regjistrua asnjë testim vullnetar dhe shkak për këtë ka qenë mungesa e kiteve në të gjitha pikat e testimit. Në fillim të vitit tjetër, testet për HIV/AIDS do të ofrohen falas për gratë shtatzëna, për t'u futur më pas edhe në grupmosha të tjera të popullatës.
Edhe në Shqipëri është bërë e mundur lindja e bebeve HIV-negativ nga dy prindër me HIV-pozitiv. Janë regjistruar në total 8 fëmijë që kanë ardhur në jetë nga prindër me HIV/AIDS.
Alma Demiraj