maj62020
Covid-19. Rritje e kërkesës për barna në Evropë. EAHP: monitoroni nivelin e rezervave
Barnat anestezike, antibiotikët dhe miorelaksantët, ashtu si dhe produkte të tjera mbështetëse për kujdesin intensiv (analgjezikët, barnat tromboprofilaksike), janë ndër nevojat kryesore të pacientëve evropianë me Covid-19. Kërkesa për këto barna është rritur në mënyrë të konsiderueshme duke shkaktuar probleme të mungesës, ndaj Shoqata Evropiane e Farmacistëve Spitalorë (Eahp) kërkon që nivelet e stoqeve të barnave të nevojshme për trajtimin e pacientëve Covid-19 të monitorohen dhe shpërndahen sipas nevojave të farmacive spitalore, me ndihmën e një procedure kërkese të dedikuar.
Shoqata Evropiane e Farmacistëve Spitalorë, së bashku me Shoqatën Evropiane të Mjekëve Spitalorë (AEMH), Shoqata Evropiane e Farmacisë Klinike (ESCP) dhe Shoqata Evropiane e Farmacisë Onkologjike (ESOP), kanë nënshkruar një deklaratë të përbashkët për trajtimin e pacientëve me Covid-19.
Dokumenti nënvizon se si "pacientët duhet të ndjekin një terapi për të cilën përdorimi i anestetikëve, antibiotikëve dhe miorelaksuesve është thelbësor. Përveç kësaj, janë të nevojshme barna të tjera mbështetëse në njësitë e kujdesit intensiv, siç janë reanimacioni, barnat respiratore dhe kardiake, analgjezikët, barnat për tromboprofilaksi, si dhe ushqim mjekësor dhe parenteral në vëllime të mëdha. Kërkesa për këto barna është rritur ndjeshëm gjatë javëve të fundit, duke shkaktuar probleme mangësish."
"Duke iu shtuar edhe pengesat e transportit dhe eksportit midis vendeve, thuhet në shënim, ulja e prodhimit në Evropë dhe problemet e furnizimit me barna dhe përbërës aktivë farmaceutikë nga vendet jo-evropiane, po bëhen gjithnjë e më të kufizuara në disa rajone. Prandaj ne inkurajojmë vendet evropiane të marrin masa të ngjashme me ato të marra në Francë dhe Holandë, ku nivelet e stoqeve të barnave të nevojshme për trajtimin e pacientëve Covid-19 monitorohen dhe ndahen sipas nevojës nga shoqata kombëtare e farmacive spitalore, me mbështetjen e një procedure kërkese të dedikuar".
Në kontekstin e kërkimeve për një trajtim kundër coronavirusit, "mjekët dhe farmacistët në përgjithësi duhet të ndjekin parimet e medikamentit të bazuar në prova. Prandaj, ne kërkojmë nga kolegët tanë që të monitorojnë me kujdes dhe të vlerësojnë të dhënat klinike dhe kërkimore në zhvillim, të përdorin praktikat e bazuara në prova kur vlerësojnë rreziqet dhe përfitimet për secilin rast individual, veçanërisht kur përdoren barna për një indikacion të pa aprovuar.
Gjithashtu, u bëjmë thirrje atyre kolegëve që kanë aftësi të marrin pjesë në aktivitete kërkimore për të lehtësuar gjenerimin dhe shkëmbimin e provave shumë të nevojshme për përmirësimin e trajtimit për pacientët Covid-19. Gjithashtu, ngremë shqetësime përsa i përket përdorimit të opsioneve të trajtimit që tashmë janë autorizuar për indikacione të ndryshme nga trajtimi i pacientëve Covid-19. U kërkojmë kolegëve tanë, si dhe qeverive kombëtare dhe autoriteteve kompetente, të sigurojnë stoqet dhe porositë për disa barna që përdoren aktualisht off-label te pacientët Covid-19, që kjo të mos ndikojë në trajtimin e pacientëve që trajtohen me këto barna."