jan182021
Covid-19. Një studim hedh dritë mbi efektet afatgjata. Simptomat vazhdojnë edhe pas gjashtë muajsh
Sipas një studimi të botuar në "Lancet", më shumë se tre të katërtat e pacientëve të shtruar në spital me Covid-19 paraqesin ende të paktën një simptomë gjashtë muaj pas fillimit të sëmundjes. "Për shkak se Covid-19 është një sëmundje kaq e re, ne jemi vetëm në fillim të të kuptuarit të efekteve të saj afatgjata në shëndetin e pacientëve. Analiza jonë tregon se shumica e njerëzve vazhdojnë të jetojnë me të paktën disa nga efektet e virusit pas daljes nga spitali dhe nënvizojnë nevojën për kujdes pas daljes nga spitali, veçanërisht për ata me infeksione të rënda", thotë Bin Cao (Qendra Kombëtare e Mjekësisë Respiratore, Spitali i Miqësisë Kinë-Japoni dhe Universiteti Mjekësor i Pekinit), i cili drejtoi grupin e punës.
Studiuesit ndoqën për një mesatare prej 186 ditësh, 1,733 pacientë me Covid-19 që kanë dalë nga Spitali "Jin Yin-tan" në Vuhan në periudhën 7 janar-29 maj 2020. Gjatë ndjekjes, 76% e pacientëve raportuan vazhdimësinë e të paktën një simptome. Nga këta pacientë, 63% raportuan lodhje ose dobësi muskulare, 26% kishin vështirësi për të fjetur dhe 23% raportuan ankth ose depresion. Pacientët me sëmundje më të rëndë kishin zakonisht funksion pulmonar të reduktuar dhe 56% e atyre me një rezultat të ashpërsisë 5-6 (që kërkonin ventilim) kanë shfaqur çrregullime të difuzionit. Pacientët me sëmundje më të rëndë kanë patur rezultate më të këqija në testin gjashtë minutësh të ecjes, me 29% të atyre me rezultat të ashpërsisë 5-6 duke ecur më pak se kufiri i poshtëm i intervalit normal, krahasuar me 24% të atyre me rezultat 3 (të cilët nuk kishin nevojë për oksigjen) dhe 22% e atyre me rezultat 4 (që kishin nevojë për oksigjen). Autorët zbuluan gjithashtu se disa pacientë vazhduan të zhvillonin probleme me veshkat pas daljes nga spitali. Testet e kontrollit të 94 pacientëve për antitrupa në gjak pas gjashtë muajsh, zbuluan se nivelet e antitrupave neutralizues ishin më të ulëta se 52.5%, krahasuar me maksimumin e infeksionit.
Monica Cortinovis, Norberto Perico dhe Giuseppe Remuzzi, nga Instituti i Kërkimeve Farmakologjike "Mario Negri Irccs", pohojnë në një editorial shoqërues se, duke qenë se ka pak raporte mbi panoramën klinike pas Covid-19, ky studim është i rëndësishëm dhe i favorshëm dhe do të jetë e nevojshme të vijohet me thellim në këtë çështje.
Lancet 2021. Doi: 10.1016/S0140-6736(20)32656-8
https://doi.org/10.1016/S0140-6736(20)32656-8
Lancet 2021. Doi: 10.1016/S0140-6736(21)00039-8
https://doi.org/10.1016/S0140-6736(21)00039-8