sht192018
Lëndimet traumatike te fëmijët. Udhëzimet e reja tërheqin vëmendje mbi ekzaminimin
Qendrat për Kontrollin dhe Parandalimin e Sëmundjeve kanë përgatitur 19 rekomandime për të ndihmuar mjekët në diagnostikimin, trajtimin dhe vlerësimin e prognozës së lëndimeve të lehta traumatike të trurit te fëmijët. "Janë hartuar udhëzime konsensusi për menaxhimin e lëndimeve të lehta traumatike të trurit te të rriturit. Në vitin 2013, u publikuan udhëzimet e bazuara në prova për menaxhimin e tronditjes cerebrale sportive te fëmijët e të rriturit dhe Fondacioni i Neurotraumës në Ontario publikoi një udhëzues të bazuar në dëshmi, për të diagnostikuar dhe menaxhuar tronditjet pediatrike në vitin 2014. Megjithatë, nuk janë krijuar udhëzime klinike të bazuara në dëshmi shkencore për diagnozën, prognozën dhe menaxhimin ose trajtimin e këtyre rasteve te fëmijët", shkruajnë autorët në "JAMA Pediatrics". Për të korrigjuar këtë mungesë, hulumtuesit propozuan një sërë sugjerimesh...
- Mjekët nuk duhet ta përdorin në mënyrë rutinë tomografinë e kompjuterizuar (TC) për diagnostikimin e lezioneve cerebrale traumatike të lehta pediatrike. Fillimisht, në bazë të rregullave klinike të vlefshme duhet dalluar nëse fëmija është në rrezik të lartë për dëmtime intrakranike (ICI) që mund të ketë nevojë për ekzaminim. Rreziqet e përdorimit të këtij instrumenti të imazherisë duhet të diskutohen me pacientin dhe familjen në kontekstin e faktorëve të rrezikut të lidhur me ICI-në.
- Rezonanca magnetike nuk duhet të përdoret në mënyrë rutinore për të vlerësuar dëmtimet cerebrale traumatike të lehta, të dyshuara ose akute. Autorët theksojnë se TC-ja me emetim të një fotoni të vetëm nuk duhet të përdoret për të vlerësuar dëmtime cerebrale traumatike të lehta, të dyshuara ose të konfirmuara dhe se radiografitë e kafkës nuk duhet të përdoren për të diagnostikuar dëmtime cerebrale traumatike të lehta, ose për të bërë një ekzaminim për ICI te pacientët pediatrikë.
- Udhëzimet kujtojnë se Vlerësimi i Standardizuar i Tronditjes nuk duhet të jetë mjeti i vetëm i përdorur për të diagnostikuar lëndimet cerebrale traumatike të lehta te fëmijët e moshës 6-18 vjeç, por diagnoza duhet të përfshijë përdorimin e një shkalle vlerësimi të simptomave, në bazë të moshës.
- Gjatë periudhës akute të lëndimit, mjekët mund të përdorin teste të kompjuterizuara njohëse të vlefshme dhe të përshtatshme për moshën, ndërsa përdorimi i bioshënjuesve për të diagnostikuar dëmtimet pediatrike nuk konsiderohet i përshtatshëm jashtë kontekstit të hulumtimit.
JAMA Pediatr 2018. doi: 10.1001/jamapediatrics.2018.2853
https://jamanetwork.com/journals/jamapediatrics/fullarticle/2698456