tet202020
Produktet për pastrimin e shtëpisë, shtojnë rrezikun e astmës te foshnjat
Një ekip kërkimor nga Universiteti "Simon Fraser" në Kanada ka demonstruar se ekspozimi ndaj produkteve të zakonshme shtëpiake të pastrimit në 3 muajt e parë të jetës, rrit rrezikun për të zhvilluar astmë ose frymëmarrje fërshëllyese deri në moshën 3-vjeçare. "Theksi më i madh në këtë studim bie në faktin se muajt e parë të jetës janë thelbësorë për zhvillimin e sistemit imunitar dhe respirator të foshnjës. Duke identifikuar ekspozime të rrezikshme në fëmijëri, mund të merren masa parandaluese për të reduktuar potencialisht astmën në fëmijëri dhe rrezikun e alergjisë që rezulton prej saj", komentoi Jaclyn Parks, autor i studimit të botuar në "Journal Medical Association Canadian".
Ndërsa shumica e provave mbi lidhjen midis astmës dhe produkteve pastruese u panë te të rriturit, në këtë studim studiuesit ekzaminuan, duke përdorur një pyetësor të plotësuar nga prindërit, ekspozimin (ditor, javor dhe mujor) e 2,022 fëmijëve të CHILD Cohort Study ndaj 26 produkteve të ndryshme shtëpiake, duke përfshirë detergjentë enësh dhe rrobash, pastrues, dezinfektues, lustrues dhe aromatizues të ajrit.
Rezultatet e analizave, të cilat morën në konsideratë ekspozimin ndaj tymit dhe historinë familjare, tregojnë se fëmijët që jetonin në shtëpi ku produktet e pastrimit përdoren me frekuencë të lartë, krahasuar me fëmijët në shtëpitë e të cilëve produktet përdoren rrallë, kishin më shumë probabilitet për frymëmarrje fërshëllyese të përsëritur (10.8% vs 7.7%), frymëmarrje fërshëllyese me atopi (3% vs 1.5%) dhe astmë (7.9% vs 4.8%), por jo atopi më vete.
"Prandaj, një mekanizëm i propozuar pas këtyre gjetjeve është që kimikatet në produktet e pastrimit dëmtojnë qelizat që veshin traktin respirator përmes rrugëve inflamatore të lindura, më shumë sesa përmes rrugëve alergjike të fituara", tha autori kryesor, Tim Takaro. Vini re se marrëdhënia midis ekspozimit të produktit dhe problemeve të frymëmarrjes ishte më e fortë te vajzat, një aspekt që kërkon kërkime të mëtejshme dhe se rreziku i përsëritjes së frymëmarrjes fërshëllyese ishte më i lartë me disa produkte, duke përfshirë deodorantët, spray-t kundër pluhurit apo disa dezinfektues antimikrobikë për duart.
"Gjetjet tona shtojnë të kuptuarit se si ekspozimet e fëmijërisë së hershme ndaj produkteve të pastrimit mund të shoqërohen me zhvillimin e sëmundjes alergjike të rrugëve të frymëmarrjes dhe ndihmojnë në identifikimin e sjelljeve shtëpiake si një zonë e mundshme për ndërhyrje", përfundojnë autorët.
CMAJ. 2020. doi: 10.1503/cmaj.190819
https://doi.org/10.1503/cmaj.190819