mar62024
Barnat onkologjike. Përfitimet dhe të ardhurat shtesë
Shumë barna onkologjike të miratuara nga Agjencia Evropiane e Barnave, në vitet 1995-2020, kanë sjellë të ardhura shtesë minimale, ose nuk kanë sjellë fare të ardhura. Kjo situatë është veçanërisht evidente për barnat e miratuara, përmes procedurave të përshpejtuara. Pavarësisht kësaj, pjesa më e madhe e medikamenteve mund t'i rikthejnë të ardhurat e kërkimit dhe zhvillimit (R&S) brenda pak vitesh nga hedhja e tyre në treg, edhe nëse nuk ka përfitime shtesë të mëdha. Ky është përfundimi i studimit të publikuar në British Medical Journal, të kryer nga Francine Brinkhuis, Universiteti i Utrehtit, Holandë.
U analizua lidhja ndërmjet përfitimeve shtesë dhe të ardhurave dhe u zbulua se, edhe pse barnat me përfitime shtesë të mëdha gjenerojnë të ardhura më të mëdha, edhe ato me përfitime shtesë më të vogla, arrijnë t'i mbulojnë shpenzimet e R&S brenda pak vitesh. Megjithatë, autorizimet e hedhjes së kushtëzuar në treg kanë demonstruar të ardhura më të ulëta për një kohë më të gjatë në kompensimin e kostove të R&D, krahasuar me autorizimet standarde.
Ekipi i studimit analizoi 131 barna onkologjike me 166 indikacione, pra, gjithsej 458 vlerësime të përfitimit shtesë. Afro 41% e këtyre vlerësimeve ishin negative ose jo sasiore. Koha mesatare për kompensimin e kostove mesatare të R&D (684 milionë dollarë) ishte 3 vjet dhe 91% e barnave i ka rikthyer këto kosto brenda tetë vitesh. Gjithashtu, u konstatua se vlerësimet negative, apo jo sasiore të përfitimit shtesë ishin më të shpeshta për autorizimet e hedhjes së kushtëzuar në treg dhe për ato të lëshuara në rrethana të jashtëzakonshme, krahasuar me autorizimet standarde.
Analiza thekson rëndësinë e rimbursimeve aktuale dhe të rivlerësimit të nxitjeve normative. "Barnat onkologjike me nivele më të larta përfitimi shtesë priren të gjenerojnë të ardhura më të larta, krahasuar me barnat që kanë përfitime shtesë të ulëta, potencialisht duke i nxitur shoqëritë farmaceutike të zhvillojnë barna me vlera të larta. Politikëbërësit duhet të vlerësojnë nëse nxitjet normative aktuale dhe të rimbursimit janë strukturuar siç duhet me qëllim promovimin dhe lehtësimin e zhvillimit të barnave më efikase për pacientët që kanë më shumë nevojë për to", shpjegon Brinkhuis.
BMJ, 2024;384:e077391. DOI: 10.1136/bmj-2023-077391