maj102017
Rrjeti i Shoqatave të Pacientëve apel për politika të reja me fokus pacientin, mes tyre ngritjen e mekanizmit të ankesës në spitale
Me rastin e Ditës së të Drejtave Europiane të Pacientëve që shënohet sot më 10 maj, Rrjeti i Shoqatave të Pacientëve me sëmundje Kronike në Shqipëri ka shpërndarë një deklaratë për shtyp në të cilën i kërkon institucioneve politikbërëse që të përfshijnë në axhendën e tyre sëmundjet kronike. Në komunikatë theksohet rëndësia e amplifikimit të zërit të pacientëve, problemet e të cilëve janë të padëgjuara ose të injoruara, nga mungesa e vetëdijes në mesin e institucioneve e publikut të gjerë, apo për shkak të mungesës së legjislacionit që mbron të drejtat e tyre. Rjeti i Shoqatave, i krijuar rishtas, nënvizon misionin e tij: "Përmirësimin e cilësisë së jetës dhe të kujdesit për trajtim dhe mbështetje të vazhdueshme nëpërmjet bashkëpunimit, bashkërendimit, advokimit dhe lobimit midis grupeve të interesit dhe anëtarëve të tjerë në nivel kombëtar dhe me gjerë, duke patur në qendër PACIENTIN.
Në Shqipëri të drejtat e pacientit ende nuk kanë marrë formë ligjore pavarësisht një sërë iniciativash që synojnë njohjen dhe zbatimin e të drejtave të pacientit nga institucionet publike, jo-publike dhe organizatat jo-fitimprurëse. Për pasojë, në këtë fushë mbetet akoma shumë për t'u bërë jo vetëm për përqasjen e legjislacionit me parimet e pranuara ndërkombëtare, por edhe për zbatimin në praktikë të tyre...
Sot ne kërkojmë: Qasje të barabartë në trajtim me ilaçe dhe ato klinike; jo më ilaçe të falsifikuara; ngritjen e strukturave për Vlerësim të Teknologjisë Shëndetësore (HTA); qasja e bazuar në të drejtat e njeriut; inovacion; përfshirjen e pacientëve në politikë-bërje; kujdes shëndetësor me në qendër pacientët; informim të pacientit me literaturë shëndetësore; rritjen e sigurisë; trajtim me medikamente prioritare; angazhim maksimal për Qëllimet e Zhvillimit të Qëndrueshëm; mbulim universal për shëndet...
Ne synojmë dhe kërkojmë diskutimin, informimin dhe sigurimin e qasjeve të reja përmes sistemit ekzistuese rregullator kombëtar të ilaçeve, për një menaxhim më të mirë të qasjes ndaj inovacionit. Qasja ndaj terapive të reja kontribuon me forcë në garantimin e cilësisë së jetës së pacientëve dhe cilësinë e shërbimeve shëndetësore të ofruara, duke respektuar vlerat themelore të njohura nga Karta Evropiane e të Drejtave të Pacientëve...
Njëkohësisht Rrjeti i Shoqatave të Pacientëve me Sëmundje Kronike mendon dhe gjykon se është momenti i inicimit dhe mbështetjes së procesit të hartimit dhe zhvillimit të mekanizmit të ankesës në spitale si dhe ngritjen e strukturave organizative nga ana e Ministrisë së Shëndetësisë".
Këtu deklarata e plotë.