mar42016

Aspirina në kirurgjinë koronarike: marrja pre-operatore ka të njëjtat risqe me placebon

Artikuj lidhur

08-09-2023 | ASA në doza të ulëta nuk indikohet për parandalimin primar të iktusit te të moshuarit

24-01-2023 | Aspirina në parandalimin kardiovaskular. Përditësohen udhëzimet

07-02-2022 | Preklampsia. Aplikacioni përmirëson respektimin e terapisë ASA me dozë të ulët

Një trial ndërkombëtar i koordinuar nga kërkues të "Monash University" në Australi tregon se te pacientët që i janë nënshtruar kirurgjisë koronarike, administrimi pre-operator i aspirinës në krahasim me placebon nuk pakëson riskun e vdekshmërisë apo komplikacionet trombotike, por as nuk shton mundësitë për hemorragji. Studimi, i koordinuar nga Paul Myles (drejtor i departamentit të mjekësisë perioperatore në Monash dhe i sapo publikuar në "New England Journal of Medicine" ka verifikuar nëse ndërprerja apo marrja e aspirinës para kirurgjisë koronarike mund të sillte më shumë risqe apo përfitime.

"Për parandalimin e infarktit dhe iktusit pjesa më e madhe e pacientëve me patologji koronarike trajtohen me aspirinë, që mund të shtojë riskun për hemorragji te pacientët e operuar", pohon autori duke shtuar se deri më tani nuk ishte e qartë nëse bari duhej të ndërpritej para kirurgjisë koronarike.
"Sugjerimet e udhëzuesve të rinj janë kontradiktore dhe organizatat profesionale nuk kanë prova të mjaftueshme për të kuptuar nëse rritja e riskut për hemorragji kirurgjikale mund të kompensohet nga efekti i përfitimeve të barit", pohon Myles, i cili nënvizon se të dhënat e mbledhura tregojnë se aspirina  në krahasim me placebon, e përdorur para ndërhyrjes koronarike nuk e redukton riskun e vdekshmërisë apo komplikacioneve trombotike.

"Duke qenë se ekspozimi pre-operator nuk e shton hemorragjinë kirurgjike, as nevojën e transfuzionit apo ri-ndërhyrjeve, nuk ka asnjë motiv për të ndaluar marrjen e aspirinës para kirurgjisë koronarike", thonë autorët, të cilët vlerësuan risqet dhe përfitimet e acidit acetilsalicilik në dozën 100 mg ditore, e konsideruar me efikasitet më të madh përballë mundësive më të vogla për komplikime hemorragjike.
"Ndërprerja e aspirinës nga 5 në 7 ditë para ndërhyrjes, shton riskun trombotik para bypass-it dhe nëse ndërhyrja anulohet ose shtyhet rriten mundësitë për të ekspozuar personat ndaj një risku afatgjatë trombotik", përfundojnë kërkuesit, të cilët kanë marrë në shqyrtim 2.100 pacientë të ndjekur në 19 spitale të pesë shteteve.

N Engl J Med 2016. doi: 10.1056/NEJMoa1507688http://www.nejm.org/doi/full/10.1056/NEJMoa1507688#t=abstract