qer252019
Diabeti i tipit 1 me fillim të vonshëm, shpesh diagnostikohet si diabet i tipit 2
Tek individët mbi 30 vjeç, diabeti i tipit 1 mund të keqdiagnostikohet si diabet i tipit 2. Kjo ndodh me rreth një të tretën e pacientëve, pasi diabeti i tipit 1 me fillim të vonshëm është i ngjashëm klinikisht dhe biologjikisht me sëmundjen që paraqitet në moshë të re.
"Ne kemi dashur të përcaktojmë prevalencën dhe karakteristikat e diabetit të tipit 1, të përcaktuar nga një mungesë e rëndë endogjene e insulinës, pas moshës 30-vjeçare", shkruan Nicholas Thomas (Universiteti Exeter në Mbretërinë e Bashkuar), autori i parë i një studimi të botuar në "Diabetologia".
Ekipi hulumtues është përpjekur të kuptojë nëse diabeti i tipit 1 me fillim të vonshëm, është identifikuar dhe menaxhuar në mënyrë korrekte, në praktikën klinike. Për këtë qëllim, të dhënat janë përdorur nga 583 pacientë me diabet të trajtuar me insulinë dhe të diagnostikuar pas moshës 30-vjeçare, të marra nga studimi kohorte DARE (Diabetes Alliance for Research in England). 21% e pjesëmarrësve i plotësuan kriteret e përfshirjes në studimin për diabetin e tipit 1. Prej tyre, 38% nuk kishin marrë trajtim me insulinë në momentin e diagnostikimit dhe 47% kanë raportuar që kanë diabet të tipit 2.
Një mungesë e rëndë endogjene e insulinës e pranishme te pacientët në çastin e diagnostikimit ishte parashikuese për nevojën e saj të shpejtë: 47% e atyre që fillimisht nuk u trajtuan me insulinë dhe që kishin nevojë për atë brenda 3 viteve pas diagnostikimit, kishin mangësi serioze të hormonit endogjen. Për më tepër, pjesëmarrësit me diabet të tipit 1 me fillim të vonshëm kishin karakteristika të ngjashme klinike me ata te të cilët sëmundja ishte shfaqur në moshë të re. Megjithatë, krahasuar me këto të fundit, pacientët e diagnostikuar pas moshës 30-vjeçare kishin një rezultat të rrezikut gjenetik mesatarisht më të ulët, një prevalencë më të lartë të autoantitrupave dhe më pak gjasa që të identifikoheshin si të sëmurë me diabet të tipit 1.
"Mjekët duhet të jenë të vetëdijshëm për faktin se, pacientët që kalojnë nga përdorimi i insulinës brenda 3 viteve pas diagnostikimit kanë probabilitet të lartë për diabet të tipit 1, pavarësisht vlerësimit fillestar", përfundojnë autorët.
Diabetologia. 2019 doi: 10.1007/s00125-019-4863-8.
https://www.ncbi.nlm.nih.gov/pubmed/30969375