sht262023
Sindroma e vezores policistike. Efektet e dobishme të dietës ketogjenike
Te gratë me sindromën e vezores policistike (PCOS) dieta ketogjenike përmirëson nivelet e hormoneve riprodhuese, sipas një studimi të botuar në "Journal of the Endocrine Society" dhe të koordinuar nga Karniza Khalid nga Instituti Kombëtar i Shëndetësisë në Kuala Lumpur.
"Edhe pse disa studime kanë sugjeruar se dieta ketogjenike ka një efekt të dobishëm në disbalancën hormonale te gratë me PCOS, të dhënat e disponueshme janë fragmentare dhe rrjedhin nga seri të vogla rastesh", shkruajnë studiuesit, të cilët në këtë rishikim të parë sistematik mbi këtë temë kanë vlerësuar efektet e dietës ketogjenike në nivelet e hormoneve riprodhuese te gratë me PCOS, dhe në veçanti raportet hormon luteinizues/hormon stimulues folikul (LH/FSH), globulinën lidhëse të hormoneve seksuale (SHBG) si dhe progesteronin dhe testosteronin e lirë dhe atë total pas të paktën 45 ditësh të ndjekjes së një diete ketogjenike, duke vlerësuar gjithashtu edhe efektet e saj në peshën trupore.
"Kërkimet sistematike të literaturës u kryen në MEDLINE, ScienceDirect, Scopus dhe Web of Science deri më 20 janar 2023 dhe u zgjodhën studime me një ose dy grupe që prodhuan rezultate interesante. Dy studiues punuan në mënyrë të pavarur për të përzgjedhur artikujt e mundshëm dhe një njëri prej tyre nxori të dhënat nga studimet dhe vlerësoi rezultatet", vazhdon Khalidi.
Të dhënat e mbledhura nuk lanë asnjë dyshim, te gratë me PCOS që ndoqën dietën ketogjenike u vu re një përmirësim i ndjeshëm në nivelet e hormoneve riprodhuese, me një ulje të raportit LH/FSH dhe e testosteronit të lirë përballë rritjes së globulinës lidhëse të hormoneve seksuale dhe humbjes së konsiderueshme në peshë të vërejtur në të gjitha studimet.
"Mekanizmat e efekteve hormonale janë të paqarta: sipas një teorie, reduktimi i hiperinsulinemisë për shkak të dietës ketogjenike ul prodhimin e androgjenëve ovarian dhe rrit nivelet e SHBG. Një hipotezë tjetër është se ketoza e shkaktuar nga dieta redukton insulinën qarkulluese dhe faktorin e rritjes-1 të ngjashëm me insulinën, duke shtypur stimulin e prodhimit të androgjenit ovarian dhe veshkave", përfundojnë autorët.
Journal of Endocrine Society 2023. Doi: 10.1210/jendso/bvad112
https://doi.org/10.1210/jendso/bvad112