mar52024
I nxehti ekstrem dhe rreziku për iktus. Studimi i ri
Në një studim të ri të publikuar në JAMA Network Open, është hedhur dritë mbi lidhjet që ekzistojnë ndërmjet temperaturave të larta dhe rrezikut të shtuar për iktus ishemik akut (AIS). Studimi i kryer nga Xinlei Zhu, Universiteti Fudan, Shangai, ka rishikuar të dhënat e 82.455 pacientëve, duke zbuluar se ekspozimi ndaj nxehtësisë së lartë lidhet ngushtë me një rrezik të shtuar për AIS. Ky rrezik shfaqet menjëherë dhe zgjat për disa orë.
Lidhja e drejtpërdrejtë ndërmjet temperaturave të larta dhe iktusit është më e fortë gjatë orëve më të nxehta të ditës, me një rrezik (raporti odds, OR) kumulativ për AIS në prani të temperaturave të larta, të barabartë me 1,88. Për më tepër, ky fenomen është më i theksuar në rajonet veriore të Kinës, një ndryshim i cili, sipas autorëve, lidhet potencialisht me përshtatshmërinë më të madhe ndaj temperaturave të larta të popullatave të jugut, ku klima është përgjithësisht më e ngrohtë.
Nga pikëpamja metodologjike, studimi përdori një modelim të kryqëzuar të rasteve të shtresuara në kohë, duke marrë parasysh ndryshoret demografike dhe klinike për të përmirësuar rezultatet. Megjithatë, studiuesit konstatuan disa kufizime të studimit, të tilla si klasifikimi i mundshëm i pasaktë i ekspozimit ndaj nxehtësisë dhe biaset e sinjalizimit.
"Këto rezultate tregojnë një lidhje të fortë që ekziston ndërmjet ekspozimit ndaj nxehtësisë dhe rrezikut të shtuar për AIS, duke theksuar urgjencën për strategji parandaluese përgjatë periudhave të të nxehtit ekstrem", shpjegon Zhu. Kjo thekson nevojën për ndërmarrjen e ndërhyrjeve publike dhe për ndërgjegjësim, me qëllim zbutjen e efekteve të të nxehtit ekstrem në shëndet, sidomos te popullatat me rrezik të shtuar për AIS.
JAMA Network Open. 2024. Doi: 10.1001/jamanetworkopen.2024.0627
http://doi.org/10.1001/jamanetworkopen.2024.0627