nën242016
Pas arrestimit të shefit të Kardiologjisë në Shkodër, kolegët e tij dalin në protestë
Policia vuri dje në pranga shefin e Kardiologjisë në Spitalin e Shkodrës, Edi Smajlaj. Ai u arrestua brenda pavionit të kardiologjisë nën dyshimin se shtroi qëllimisht në spital, pedagogun Simon Luli i akuzuar nga Prokuroria për ryshfet, pikërisht për t'i shpëtuar arrestimit.
Mëngjesin e sotëm personeli mjekësor i spitalit të Shkodrës u mblodh për të protestuar kundër masës së arrestit të kardiologut. Sipas tyre tashmë është bërë zakon zhvlerësimi dhe cenimi i padrejtë i mjekëve dhe rasti i fundit është ai Smajlaj, i cili po aq padrejtësisht është denigruar në vendin e tij të punës. Për këtë arsye mjekët kërkuan tërheqjen e masës së ashpër të sigurisë dhe rikthimin e kolegut të tyre në detyrë, në të kundërt protestat e tyre do të përshkallëzohen.
Burime pranë Prokurorisë pohojnë se Smajlaj hapi kartelë mjekësore pa asnjë arsye për pedagogun Simon Luli, ndërkohë që nuk ishte as në shërbim, dhe e bëri këtë qëllimisht, në mënyrë që Luli të mos dërgohej në qelinë e paraburgimit.