pri92020
Zgjerohet lista e barnave të lejuara për përdorim kundër coronavirusit. Ja, përditësimet
Janë gjithnjë e më të shumta molekulat e përdorura tashmë për patologji të tjera, të cilat kanë nisur të përdoren në luftën kundër SarsCov2, duke shfaqur një efekt të caktuar kundër virusit të ri.
Të rejat e fundit vijnë nga medikamenti ruxolitinib, për të cilin Agjencia Italiane e Barnave (AIFA) ka aprovuar një protokoll për përdorim të dhembshur. Deri në fund të muajit prill, gjithashtu do të jetë gati një test i parë serologjik, i cili do të vlerësohet së bashku me testet e tjera të të njëjtit lloj nga Instituti i Lartë i Shëndetësisë dhe Komiteti Shkencor Teknik në Itali.
AIFA ka dhënë leje për përdorimin e mundshëm të ruxolitinibit (tashmë të përdorur në fushën hematologjike), tek ata pacientë Covid-19 me insuficiencë respiratore, të cilët nuk kërkojnë ventilim të asistuar invaziv. Bari do të jetë i disponueshëm në të gjitha spitalet italiane sipas kërkesës së mjekut: ai mund të lehtësojë efektet e një reaksioni të rëndë inflamator (sindromi i lëshimit të citokinës) që mund të ndodhë gjatë Covid-19, duke zvogëluar kështu numrin e pacientëve që kërkojnë kujdes intensiv dhe ventilim mekanik.
Komisioni Teknik Shkencor në AIFA po heton gjithashtu edhe përdorimin e një trajtimi tjetër. Quhet opaganib dhe është një përbërës kimik me veti antiinflamatore dhe antivirale që ende testohen për të lehtësuar inflamacionin e mushkërive, siç është pneumonia. Një program përdorimi i dhembshur për Covid-19 sapo ka filluar në Izrael dhe molekula mund të futet në Itali përmes një programi të qasjes përmes përdorimit të dhembshur.
Hapa përpara janë hedhur edhe në fushën e testeve diagnostikuese: kompania DiaSorin ka përfunduar në Poliklinikën San Matteo të Pavias studimet e nevojshme për fillimin e një testi të ri serologjik të përpunimit me vëllim të lartë, për të zbuluar praninë e antitrupave në pacientët e infektuar me SarsCov2. Tani, kompania po punon për marrjen e markës CE dhe autorizimit për përdorim emergjent nga FDA-ja deri në fund të prillit.
Premtuese është gjithashtu qasja që përfshin përdorimin e plazmës nga subjektet e shëruara nga Covidi. Ka studime të ndryshme në këtë fushë, në të cilat përfshihet edhe kompania farmaceutike Kedrion Biopharma. Ajo bën të ditur se "mund të vijë më herët nga ç'pritet", një terapi efikase që rrjedh nga përdorimi i plazmës së dhuruar nga njerëz që kanë kapërcyer sëmundjen dhe për këtë arsye, ajo është e pasur me antitrupa kundër virusit. Sidoqoftë, problem mbetet mungesa e disa barnave të përdorura pikërisht për të përballuar urgjencën. Ky është rasti i antimalarikut hidroksilklorokinë. Por një lajm i mirë vjen nga India, e cila ka rishikuar ndalimet e eksportit të këtij medikamenti, pasi kontrolloi disponueshmërinë e gjerë të stoqeve të brendshme, duke lejuar kompanitë që e prodhojnë atë, të respektojnë kontratat e nënshkruara më parë.