tet172022
Prania e një ose më shumë sëmundjeve autoimune rrit rrezikun kardiovaskular
Krahasuar me njerëzit pa sëmundje autoimune, ata që vuajnë prej tyre kanë një rrezik 1.4-3.6 herë më të lartë, në varësi të patologjisë në fjalë, për të zhvilluar sëmundje kardiovaskulare. Këto janë rezultatet e një studimi të nënshkruar nga Nathalie Conrad nga Universiteti Katholieke (KU Leuven) në Leuven, Belgjikë.
"Përafërsisht 10% e popullsisë që jeton në rajone me të ardhura të larta si Evropa dhe Shtetet e Bashkuara janë të diagnostikuar me një ose më shumë sëmundje autoimune si: artriti reumatoid, psoriaza, skleroza sistemike, lupusi eritematoz dhe diabeti i tipit 1", shkruajnë autorët, duke deklaruar se megjithëse hulumtimet e mëparshme kanë treguar se ekziston një lidhje ndërmjet këtyre sëmundjeve dhe rrezikut të shtuar kardiovaskular, këto studime ishin shumë të vogla dhe të kufizuara për të nxjerrë përfundime të qëndrueshme.
Në Kongresin vjetor të Shoqatës Evropiane të Kardiologjisë të mbajtur në 26-29 gusht në Barcelonë, një grup kërkimor ndërkombëtar i koordinuar nga KU Leuven prezantoi rezultatet e një sondazhi epidemiologjik, i cili u botua më pas në The Lancet, bazuar në të dhënat nga Clinical Practice Research Datalink (CPRD), një depo elektronike e të dhënave anonime të pacientëve nga rreth një e pesta e popullsisë aktuale në Britani.
Nga 22 milionë të dhëna mjekësore në dispozicion, studiuesit zgjodhën një grup pacientësh me sëmundje autoimune të sapo diagnostikuara, duke parë incidencën e ngjarjeve kardiovaskulare në vitet e mëvonshme për t'i krahasuar me një grup kontrolli. Në këtë mënyrë ata zbuluan se mundësitë e zhvillimit të sëmundjeve kardiovaskulare te pacientët me një ose më shumë sëmundje autoimune ishin mesatarisht 1.56 herë më të larta krahasuar me pacientët pa këto sëmundje. Por jo vetëm kaq, rreziku rritej sipas numrit të sëmundjeve autoimune për çdo pacient. Më të rrezikuarit ishin pacientet me sklerozë sistemike, sëmundjen e Addison-it, lupus dhe diabet të tipit 1.
"Deri më tani, shumica e studimeve mbi çrregullimet kronike inflamatore dhe rrezikun kardiovaskular janë përqendruar në një entitet të sëmundjes dhe në të njëjtën kohë janë përdorur teknika të marrjes së mostrave me madhësi të moderuar. Por rezultatet e këtij studimi masiv i hapin rrugën zhvillimit të masave parandaluese të synuara për këta pacientë. Tani nevojiten më shumë kërkime për të ndihmuar të kuptojmë pse pacientët me një sëmundje autoimune janë më të rrezikuar për të zhvilluar më shumë sëmundje kardiovaskulare krahasuar me të tjerët dhe si mund të parandalohet kjo", thotë në një editorial komentues Paul Ridke nga Qendra për Parandalimin e Sëmundjeve Kardiovaskulare në Brigham.
Lancet 2022. Doi: 10.1016/S0140-6736(22)01349-6
https://doi.org/10.1016/S0140-6736(22)01349-6
Lancet 2022. Doi: 10.1016/S0140-6736(22)01602-6
https://doi.org/10.1016/S0140-6736(22)01602-6