maj162019
Zbulohen variantet gjenetike që favorizojnë shfaqjen e diabetit të tipit 2 te të rinjtë
Ekzistojnë shtatë variante gjenetike të lidhura me fillimin e hershëm të diabetit të tipit 2 te të rinjtë, sipas një studimi të prezantuar në Konferencën e Shoqatës Akademike të Pediatrisë në Baltimorë. Ky është studimi i parë gjenomik [Genome-Wide Association Study (GWAS)] me një spektër kaq të gjerë që zbatohet në këtë fushë dhe që ka përdorur të dhëna nga konsorciumi Përparimi në Gjenetikën e Diabetit të të Rinjve (ProDiGY), një bashkëpunim i TODAY, SEARCH for Diabetes in Youth dhe i grupeve të studimit T2D-GENES.
Gjashtë nga variantet gjenetike në fjalë kanë qenë të lidhura edhe me diabetin e tipit 2 te të rriturit dhe një duket se ka qenë unik vetëm për më të vegjlit. Për më tepër, disa nga variantet kanë qenë të lidhura me obezitetin dhe rrjedhimisht, me rrezikun e zhvillimit të diabetit të tipit 2, me efekte që kanë ndoshta përmasa më të mëdha se ato të vërejtura te të rriturit. "Prevalenca e diabetit të tipit 2 po rritet në mënyrë dramatike te të rinjtë dhe sëmundja shfaqet tani në mosha në të cilat më parë ka qenë e rrallë, madje edhe jo ekzistente", shpjegon Rose Gubitosi-Klug (Spitalet Universitare Rainbow Babies & Children's), i cili ka drejtuar grupin e punës.
"Diabeti i tipit 2, me shfaqje në moshë të re, ka tendencën të jetë më agresiv sesa diabeti i tipit 2 te të rriturit dhe njohja e varianteve gjenetike që janë të përfshira, do të na ndihmojë të gjejmë objektivat për trajtimet e mundshme", vazhdon ai. Studimi u përqendrua te 3,006 të rinj me moshë mesatare 15 vjeç (62% femra, 22% njerëz të bardhë, 36% afrikano-amerikanë, 42% hispanikë). Duke komentuar deklaratën për shtyp, Raffaella Buzzetti (Universiteti "Sapienza" i Romës dhe Shoqëria Italiane e Diabetologjisë), thekson se kërkimi gjenetik është shumë i rëndësishëm në diabetin e tipit 2 te të rinjtë. Në të vërtetë, edhe pse mbipesha dhe obeziteti janë dy nga faktorët kryesorë të rrezikut për sëmundjen, jo të gjithë fëmijët në mbipeshë e zhvillojnë atë, aq shumë sa që në Itali, ku prevalenca e mbipeshës dhe e obezitetit infantil është ndër më të lartat në Evropë, diabeti i tipit 2 në popullsinë pediatrike është relativisht i vogël, duke demonstruar rëndësinë që ka trashëgimia gjenetike në ndjeshmërinë ndaj sëmundjes.
Deklaratë për shtyp