gus32021
Diabeti i tipit 2. Kontrolli i hershëm i glicemisë është thelbësor për prognozën e ardhshme
Një studim i botuar në "Diabetes Care" dhe i kryer në bashkëpunim midis universiteteve të Gotenburgut dhe Oksfordit tregon se pacientët me diabet të tipit 2 (DM2) e kanë shumë të nevojshme të arrijnë kontrollin e glicemisë në kohën më të shkurtër të mundshme dhe se vitet që ndjekin menjëherë diagnozën janë, nga ky këndvështrim, jashtëzakonisht kritike përsa i përket rrezikut për infarkt të ardhshëm dhe vdekje.
Studiuesit, të udhëhequr nga Marcus Lind në Gotenburg dhe Rury Holman në Oksford, hetuan rëndësinë e niveleve të sheqerit në gjak që nga koha kur është diagnostikuar DM2 për rrezikun e infarktit dhe vdekjes, bazuar në të dhënat e mbledhura nga një studim kyç mbi diabetin e tipit 2, UK Prospective Diabetes Study (UKPDS). Rezultatet tregojnë se nivelet e glukozës në gjak në fazat e hershme të sëmundjes kanë një ndikim shumë më të rëndësishëm sesa mendohej në prognozën e ardhshme. Për ta thënë në shifra, arritja e një kontrolli të mirë metabolik, sipas udhëzimeve aktuale, të shprehura me vlerat e hemoglobinës së glikozuar (HbA1c) prej 6.9% ose më të ulët, shoqërohet me një rrezik vdekjeje rreth 20% më të ulët, 10-15 vjet më vonë sesa në kontrollin më të dobët të glicemisë, me vlera HbA1c prej 8%.
Por kjo nuk është e gjitha: nëse vlerat optimale të glicemisë arrihen 10 vjet pas diagnozës, rreziku i vdekjes zvogëlohet me vetëm rreth 3% në krahasim me atë që lidhet me një kontroll metabolik jooptimal. "Këto rezultate dëshmojnë se në DM2, optimizimi i hershëm i glukozës në gjak është kritik në aspektin prognostik", thekson Lindi. Dhe Holmani përfundon: "Këto rezultate të reja japin një shpjegim për të ashtuquajturin "efekt trashëgimi" glicemik, të identifikuar së pari nga UKPDS-ja: në DM2, kontrolli i mirë i glicemisë i arritur menjëherë në pacientët e sapodiagnostikuar zvogëlon rrezikun e komplikacioneve diabetike dhe vdekjes deri në 30 vjet. Zbulimi i efektit të trashëguar ka bërë që udhëzimet e trajtimit në të gjithë botën të rekomandojnë nevojën për të arritur një kontroll të mirë të glukozës në gjak, sa më shpejt të jetë e mundur.
Diabetes Care 2021. Doi: 10.2337/dc20-2439
http://dx.doi.org/10.2337/dc20-2439