kor142020
Alopecia femërore. Duhet ndërhyrë menjëherë, pa u bazuar në nivelet e androgjenit
"Te gratë, flokët mund të bien ose të rrallohen edhe nëse përqendrimet e androgjenit në gjak janë normale". Kështu thotë Cecilia Motta, koordinatore e Grupit të Endokrinologjisë Gjinekologjike në Shoqatën Italiane të Endokrinologëve (AME). Përkundër asaj që besohet, alopecia femërore nuk ka gjithmonë si shkak nivelet e larta të hormonit mashkullor dhe për këtë arsye, androgjenet, duke mos u konsideruar gjithnjë si bioshënjues, jo domosdoshmërisht duhet të udhëheqin trajtimin. "Kjo do të thotë, pra, që shumë gra me këtë problem, mund të përfitojnë ende nga minoxidili, terapia lokale me efekte antiandrogjenike, edhe nëse përqendrimet e androgjenit në gjak janë normale", shpjegoi Motta.
Shkaqet e tullacërisë femërore, një çrregullim që prek rreth 4 milionë italiane dhe është i zakonshëm sidomos pas menopauzës, nuk dihen ende, por siç theksohet nga vetë Motta, mund të ndikojnë gjenet e trashëguara dhe ndoshta inflamacioni i lëkurës së kokës. Përveç kësaj, nuk ka kurë përfundimtare, por vetëm trajtime që mund të bllokojnë ose ngadalësojnë rënien e flokëve; trajtime që duhet të fillojnë sa më shpejt të jetë e mundur. Terapisë së linjës së parë, me minoxidil, mund t'i shtohet në disa raste, një terapi sistemike antiandrogjenike. Sidoqoftë, nuk është i qartë përfitimi nga terapia me lazer me intensitet të ulët dhe injeksione të plazmës së pasur me trombocite. Për një grua, rënia e flokëve, e cila mund të ndodhë në dy modele (në zonën qendrore të kokës ose kryesisht, në pjesën e përparme), mund të ketë ndikim të madh në mirëqenien psikologjike dhe në cilësinë e jetës së saj.
"Është thelbësore të kontaktohet menjëherë një endokrinolog, i cili do të bëjë një vlerësim të saktë klinik dhe do të fillojë të ndërtojë, me përfshirjen e mundshme të figurave të tjera të specializuara, siç është dermatologu, planin e duhur terapeutik", shpjegon Vincenzo Toscano, ish-president i AME-s. AME ka risjellë në vëmendje edhe rekomandimet e Shoqatës Androgen Excess (AE) -PCOS Society, në lidhje me vlerësimin, diagnostikimin dhe trajtimin e alopecisë femërore dhe lidhjen e saj me hiperandrogjenizmin.
Deklaratë për shtyp