maj252020
Infeksioni nga Covid-19. Rezultati i rrezikut parashikon evolucionin klinik. Ja, si funksionon
Cilat tipare epidemiologjike dhe klinike shoqërohen me një evolucion klinik jashtëzakonisht të pafavorshëm te pacientët e shtruar në spital me sëmundjen Covid-19? A mund të përdoren këto veçori për të parashikuar se kush do të ketë nevojë për ICU dhe ventilim mekanik? Për t'iu përgjigjur këtyre pyetjeve, Wenhua Liangu dhe kolegët e tij nga Spitali Universitar Guangzhou në Kinë kanë zhvilluar, vërtetuar dhe raportuar në një artikull në "Jama Internal Medicine" një rezultat klinik bazuar në 10 parametra. Ai jep mundësi për të parashikuar se cilët nga pacientët e shtruar në spital me infeksionin Sars-Co-2 do të shkojnë drejt një sëmundjeje kritike.
"Evolucioni i pneumonisë Covid-19 ndryshon nga rastet e lehta, në ato të rënda. Të parët janë pacientët me ethe dhe kollë, ndjekur nga prodhimi gëlbazës dhe dispnea nga sforcimi, ndërsa insuficienca respiratore, sindroma e distresit respirator, pamjaftueshmëria e zemrës dhe shoku septik janë të zakonshme te pacientët me sëmundje kritike", shkruajnë autorët, të cilët kanë analizuar një grup retrospektiv 1.590 pacientësh pozitivë me Covid-19, të ndjekur në 575 spitale në Kinë. Ata kanë nxjerrë një rezultat, aftësia parashikuese e të cilit u mat me metodën statistikore të lakoreve Roc (Karakteristika Operative e Marrësit).
Rezultati u vërtetua më pas duke përdorur katër grupe kontrolli shtesë, me një numër të përgjithshëm prej 710 vetësh. Duke u nisur nga 72 faktorë të mundshëm parashikues, Liangu dhe kolegët identifikuan 10 ndryshore të pavarura, të cilat i kanë përfshirë në rezultatin e rrezikut: radiografia patologjike e toraksit, mosha e përparuar, hemoptiza, dispnea, humbja e vetëdijes, komorbiditeti, historia e kaluar e kancerit, marrëdhëniet neutrofile-limfocite, etj. dehidrogjenaza e laktatit (Ldh) dhe bilirubina e drejtpërdrejtë. Rezultati mund të llogaritet përmes një algoritmi që është i disponueshëm falas online (http://118.126.104.170/).
"Vlerësimi i mundësive për një evolucion kritik të infeksionit Covid-19 mund të ndihmojë si në vendosjen me kohë të terapisë më të përshtatshme, ashtu edhe në optimizimin e përdorimit të burimeve mjekësore", përfundojnë studiuesit.
Jama Intern Med. 2020. Doi: 10.1001/jamainternmed.2020.2033
https://doi.org/10.1001/jamainternmed.2020.2033